Егетемнең башка кыз белән йөргәнен белдем. Миңа нишләргә?

Исәнмесез, “Туйлар.ру” сайты. Сезнең аша психологка сорау бирәсем килә. Минем очрашып йөргән егетем бар. Күптән түгел миңа аның тагын бер кыз белән очрашып йөрүен хәбәр иттеләр. Өстемә салкын су койгандай булдым. Хәзер миңа нишләргә икәнен дә белмим, югалып калдым. Аның белән мөнәсәбәтләремне туктатыйммы яисә аның белән сөйләшеп, бу мәсьәләгә ачыклык кертергә тырышаргамы? Алдан ук рәхмәт.” Гүзәл, 24 яшь, Казан.

Психолог Резеда Попова җавабы:

- Безнең җәмгыятьтә хатын-кызлар гына түгел ир-атлар да кеше сиңа беренче көненнән үк тугъры булырга тиеш дигән фикердә тора. Алай уйлаганда кешенең күңеле тыныч, ләкин шул ук вакытта ул сайлау мөмкинлеген дә юкка чыгара. Гүзәлнең соравына әйләнеп кайтсак, мин аңа егетен мәҗбүриләп үзе янында гына булуын таләп итәргә киңәш итмәс идем. Гүзәл, сөйгән егетеңә ачуланып, үпкәләп йөрү, талашу яисә аерылышу - болар барысы да төп сәбәпне белергә ярдәм итмәячәк. Әгәр егетең сиңа чыннан да ошый икән, мөнәсәбәтләреңне дә, үзеңне дә үстерү өстендә эшлә. Шул очракта егетең теге кызнымы яисә сине сайларгамы дигән сорау каршында калгач, дөрес нәтиҗә чыгарыр. Аңардан тугърылык таләп итәргә ул бит әле синең ирең түгел. Ул синең кебек үк ирекле кеше, тиң ярын эзләргә хакы бар. Аннары, ул синнән тыш башка кыз янында була икән, димәк ул анда синнән ала алмаган хисләрне таба. Бәлки сиңа да шуны аңларга һәм үзегезнең мөнәсәбәтләрдә шул хисләрне булдырырга кирәктер.