Альбина Апанаева әни булырга җыена (ФОТО)

Хәзер ул әзерлек курсларына йөри, тормышының иң мөһим вакыйгасына әзерләнә. Бәләкәчнең дөньяга аваз саласы көннәре  якынлашса да, бәхетле әти-әни әле исем сайлый алмаган.

Бәби көткәндә хатын-кыз рухи яктан үсеш кичерә дигән сүзләрне истә тотып, Альбина иҗатта да тик тормый. Апрель ахырына җырчының биш ел көтелгән альбомы дөнья күрәчәк. «Синең мәхәббәтең» дип аталачак иҗат җимеше үз эченә жанр һәм эчтәлек ягыннан да төрле композицияләрне җыйган.

«Тормышчан җырлар артты», – дип елмая Альбина үзе. Шундыйларның берсе «Хатын-кыз теле белән» җыры.  Альбина Ләйлә Дәүләтовага күптән заказ биргән булган аңа. Вакыт үткән, Альбина инде бу темага суынган. Һәм менә ниһаять, шагыйрә Апанаеваның чираттагы туган көненә әлеге җырны бүләк итеп алып килгән. Көйне Марат Мухин язган. Ә калган җырларның ниндирәк булуын сез альбомны кулыгызга төшергәч белә алырсыз.