Гөлназ Закирова кияүгә чыккан (ФОТО)

Гөлназ булачак ире Ленар белән дус кызының туган көнендә танышкан. Шунысы кызыклы, аларның мәхәббәте дуслыктан үсеп чыккан икән. Бу хакта җырчы менә ниләр сөйләде: «Бер-беребезгә карата симпатия уянды, әлбәттә, ләкин ул вакытта төрле җирләрдә яши идек – ул туган шәһәрем Яр Чаллыда, ә мин Казанда. Шулай бер-беребезгә күз атып йөри торгач, очраша башладык. Бер елдан гаилә корып җибәрергә булдык: былтыр 25 ноябрьдә никах укыттык, 15 декабрьдә туй ясадык».

Кияүгә 30 яшь, иҗат дөньясына кагылышы юк, бөтенләй башка өлкәдә эшли икән. Бик булдыклыга охшап тора, чөнки «выкуп» вакытында сөйгәненә кагылышлы бөтен сорауларга төгәл җавап бирүе белән Гөлназның дус кызларын таң калдырган.

Гөлназ туйда «Карашларың синең» исемле җыр башкарган. Әлеге җырның көен үзе иҗат иткән, сүзләре Хәнәфи Бәдигыйныкы. Гөлназ әтисенең (танылган композитор Илгиз Закиров – tuylar.ru) һөнәрен сайлаган. Өстәвенә, шәп итеп җырлый да. Алты яшеннән музыка мәктәбенә сукмак салган, Казан Дәүләт Консерваториясендә композиторлар әзерли торган бүлектә белем алган Гөлназ. Башкару осталыгын сынап карарга да өлгергән – «Дуслык моңы», «Татар моңы» бәйгеләрендә, С.Сәйдәшев исемендәге яшь композиторлар конкурсы лауреаты ул. Хәзерге вакытта Яр Чаллыда мәдәният идарәсендә эшли. Ә бүген Россия күләмендә мәдәният хезмәткәрләре көнен билгеләп үтәләр. Яшь белгеч Гөлназ Закированы һөнәри бәйрәме белән котлыйбыз, эшчәнлегендә һәм гаилә тормышында уңышлар телибез!