Гүзәл һәм Илдарның икенче балалары туды

“Кичә кичке унберләрдә Гүзәлне балалар тудыру йортына илттем, - ди бәхетле әти, – бүген төнлә шалтыклы хәбәр белән үзе шалтыратты. Аллага шөкер, кызыбыз исән-сау туган. Буе 50 см, авырлыгы 3510 грамм”.

Бүген Илдар чәчәкләр алып, шулпа пешереп Гүзәл һәм кызы янына ашыкты, дип хәбәр итә urazova.ru рәсми сайты. “Гүзәлнең кәефе шат. Баланы, әлбәттә, әле миңа күрсәтмәделәр,” – диде Илдар. Бала җиңел табылган. Озак тулгаклар булмаган.

Исем дә әзер икән инде.

- Беренче балабыз Элларига исемне Гүзәл тәкъдим иткән иде. Бу юлы минем чират (көлә Илдар). Әлбәттә, тәкъдим итү генә миннән. Ул барыбызга да ошарга тиеш бит. Мин Камилә исемен тәкъдим иттем.

Баксаң, Камилә исеме юктан гына чыкмаган икән. Заманча һәм чын татарча булуыннан бигрәк ул Хәкимовлар гаиләсенә аеруча якын. Чөнки Илдарның да, Гүзәлнең дә карт әниләре Камилә исемле булган! Менә шундый матур очраклылык.

Хәер, эш исемдәмени. Иң мөһиме, бала сау-сәламәт булсын, әти-әнисен шатландырсын, якты дөньяда үз урынын тапсын. Ураза гаете көннәрендә туган бала игелекле, бәхетле булып үссен иде! Амин.