“Казан егетләре” бүләккә машина көтә

 - Бер көнне почтадан студиягә шалтыраттылар. “Сезнең адреска посылка юллаганнар. Килеп алыгыз”, - диләр. Без инде аптырап киттек, бераз куркып та калдык. Шулай да посылканы барып алып кайттык, карасак, бик зәвыклы өч пинҗәк җибәргәннәр. Безнең өчен бер дә көтелмәгән бүләк булды бу. Кирәк бит, хәтта үлчәмнәребезгә кадәр белгәннәр, - дип сөйләде “Казан егетләре”.

Посылка Казахстаннан ук килгән. Андагы җанатарлары “Казан егетләре”н шул рәвешле бүләкләргә булганнар. Пинҗәкләрне алып, өч көн узганнан соң, төркемнең электрон почталарына хат килә. “Егетләр, Казахстаннан күп сәламнәр юллыйбыз. Яңа еллар белән сезне. Җибәргән посылкабызны алгансыздыр дип уйлыйбыз. Бездә матур итеп чыгыш ясадыгыз. Рәхмәт сезнең үзегезгә, иҗатыгызга! Бары бәхет сезгә”, - дигән эчтәлектәге хат язалар. Дөрес, “Казан егетләре”нә бүләкләрне еш бирәләр, тик монысы бөтенләй көтелмәгәнчә килеп чыга. Моңарчы оригиналь бүләкләрдән аларның иҗатын яраткан кызлар төркемдәге егетләрнең фотосурәтләре төшкән кызыл төстәге мендәр бүләк иткән булганнар.

- Узган елны без Казахстанның төрле зур шәһәрләрендәге Сабантуйларда чыгыш ясадык. Андагы тамашачылардан мондый бүләк алырбыз дип уебызга да китермәдек. Безне шулай зурлаганнары өчен бик зур рәхмәт аларга! Икенче Яңа елга өчебезгә өч машина бүләк итәрләр инде. Монысы шаярып кына, әлбәттә, - дип елмаеп калды егетләр.

Чыганак: "Интертат.ру" электрон газетасы