Гүзәл Уразова һәм Илдар Хәкимовның өченче балалары туды

Сабый Казандагы Большая Красная урамында урнашкан РКБ-3 (“Красный крест”) балалар тудыру йортында дөньяга килгән. Буе 54 см, авырлыгы 3800 грамм. Малайга Самир дигән исем әзерләп куйганнар. Илдар Хәкимовтан хис-тойгылары турында белештек. “Канат!” – диде җырчы бер сүз белән генә. Кичә кичке җидедә Гүзәлне балалар тудыру йортына алып барган. Бүген олы кызлары Элларины мәктәпкә 1 сентябрьгә, Камиләнең “эше” исә – балалар бакчасы. Ә аннары малай артыннан барасы булачак. Монда чыннан да канат кирәк була башламагае күп балалы әтигә. Гүзәлне дуслары хәзер «мать-героиня» дип, ә Илдарны «отец-молодец» дип йөртәләр икән. “Льготаларын кая куеп бетерерсез инде”, - дип шаярта ди бер танышлары. Льготада мени эш! Өченче бала туган бит! Бер бала – ярты бала, ике бала – бер бала ди халык. Бу әйтемне Хәкимовлар гаиләсе девиз итеп алган булса кирәк. Бәхетле гаиләне чын күңелдән котлыйбыз.