Раниль туган көнендә 3480 котлау кабул иткән (ФОТО)

Иң кыю фанатлары җырчының үзе белән күрешеп котлады, бүләкләрен тапшырды. Аеруча берничә кызныкы бик оригиналь иде.
Наилә Ранильгә карата булган хис-тойгыларын Сөмбел Билалованың «Бәхетле төш» исемле җырын башкарып, махсус диск ясаган, сафлык билгесе булган ак төстәге 5 роза чәчәге бүләк итте.

Эльмира исә НКЦ янына яшел төстәге «Лансер» машинасына утырып свиданиега килде. Махсус заказ белән искиткеч үзенчәлекле торт пешерткән. Татлы бүләкнең өстендә ат!: «Атны да ашарга ярый, яме», – диде Эльмира, Җырчының шатлыклы күзләрен күреп, Ранильнең атлар яратуын бик яхшы белә икән.

Бер фанаткасы 7 төрле шешә бүләк итте... Атнаның кайсы көнендә нинди сыеклык эчәсен билгеләгән «үзенчәлекле коллекция» бу. Юмор хисе ташып торган Раниль бу сюрпризны алгач әйтеп куйды: «Мин боларны, Алла боерса, 127 яшемә җиткәч ачып эчәм», диде. Аңа быел ничә яшь тулганына төшенгәнсездер, шәт. Ранильгә иң ошаганы шул – шимбә – аракы, якшәмбе – минераль су. Туташ менераль су шешәсенә җырчының балачак фотосын да ябыштырып куйган.

Римма да Ранильнең ниләр белән «җенләнгәнен» белә торган кыз булып чыкты – брендлы футболкалар бүләк итте. 

Туган көн бүләкләре арасында тагын бер оригиналь бүләк бар, ләкин Раниль бу серне һич кенә дә чишәргә теләми. Әйтми дә, фотосын да күрсәтми. Бу кыз бүләге белән барысын да уздырган, күрәсең. Ләкин бер ышанычлы чыганак аша бу серне тәки чиштек – 10 пар кыйммәтле плавки булып чыкты.